لى الأمـــام .. ثــوره.. ثــوره...على الدهووووون

بسم الله نبدء .. وببركته نستمر .. وبقدرته نستعين ...

فى الحقيقه هيا متعتبرش بدايه قوى .. لأن دى طبعا مش اول مره لينا فى رحلة البحث عن الرشاقه .. بس خلينا ننسى اللى فات ونعتبرها بدايه جديده ...ثوره جديده ... ثوره حقيقيه .. ثوره على الدهون .. علشان بصراحه كلنا طالبه معانا ثوره اليومين دول ... بس ثوره بجد زى ثورتنا مش زى ثورة القذافى ابو زنجه زنجه ..(مع انى اقتبست منه العنوان هههههه اعمل ايه مش قادره اقاوم حبوب الهلوسه اللى لسه ضارباها الصبح )

وعلشان ما حدش يتوه مننا هنلخص الموضوع فى نقط :



أولا:



الجروب ده للباحثات عن الرشاقه بشكل جدى وحاسم يعنى مش بنجرب حظنا ويا نوصل يا ما نوصلش .. لا احنا كلنا هنوصل ان شاء الله لأن ربنا اللى قال كده مش احنا .. مش ربنا عز وجل قال انه لا يضيع اجر من احسن عملا .. هو جروبنا ده بقى لمن تحسن العمل فى سبيل الوصول لهدفها وليس للتسليه وتضييع الوقت واليأس وخلافه..(وده طبعا مش معناه ان دمنا تقيل ولابسين نضارات قعر كبايه وقاعدين ننكدعلى بعض وعلى اى حد معدى من جنب الجروب لاااااااااا يا ماما لااااا .. مش أحنا ..على رأى ونيس هههههههه واللى مجربنا اكيد عارف ..)

ثانيا:



الجروب سيكون باذن الله محدد المده لأن من خلال تجاربنا السابقه الجروبات دى بتكون ملزمه وجديه اكتر من الجروبات مفتوحة المده .. و عليه جروبنا هيبتدى باذن الله يوم الجمعه القادم 15 ابريل ولمدة 3 شهور حتى يوم 15 يوليه علشان رمضان هيكون اول اغسطس كل سنه وانتو طيبين. (وده بيفكرنى بأول جروب لينا مع بعض كان برضه حوالى 4 شهور على رمضان هههههه تعيشو وتفتكرو )

ثالثا:



هيكون فيه اشراف تطوعى من سوسو (البتول) و ام انس (صبرنى يا رب) ونونو (ام شوشو وبودى) و (أى واحده تانيه حظها يوقعها فينا هههههههه ) على تنفيذ النظام علشان ضمان الجديه والاستمرار والتفاعل.. سوسو تشرف على امور التغذيه وهتكون تحت امركم كلكم فى اى نظام غذائى او وصفات اكل او طريقة اكل او مشروبات او اى حاجه ليها علاقه بالتغذيه السليمه .. أم شوشو وبودى بقى مسئولة عن الرياضه ومتابعتها .. أما حبيبتنا ام انس فدورها اصعب واهم لأنها هتكون مسئوله عن الاشراف الدينى لينا كلنا .. يعنى تتابع معانا الاهتمام بالفروض وتشجعنا على النوافل والاذكار وتحاسبنا على التقصير وهكذا .. (والجانب ده مهم جدا جدا جدا يا بنات علشان طبعا كلنا زى ما احنا عارفين اهمية الجانب النفسى فى عملية التخسيس وقد ايه ثقتنا بربنا ورضا ربنا علينا هتحسن نفسيتنا وهتنطبع علينا .. ده غير بركة ربنا ومساعدته ودول اللى ما حدش يستغنى عنهم لأن من غيرهم لا هنروح ولا هنيجى ولا هنتحرك خطوه )...
ملحوظه عالماشى بقى .. الاشراف والمتابعه دول مش حكر على المشرفات لازم كلنا نكون مركزين مع بعض وكل واحده تقدر تساعدنا وتساعد اخواتها لازم تشارك من مبدء التعاون على البر والتقوى.

رابعا:



نظااااااام جديد بقى يا بنات هو نظام العقوبات .. علشان مصلحتنا هيكون من حق كل مشرفه تطبق عقوبه على اى واحده قصرت فى شغلها زى الموظفين كده بالظبط ههههه .. بس عقوباتنا بقى هتكون مفيده يعنى مثلا اللى هتعك فى الاكل بتاعها فى حاجه تيجى تعترف علطول فنحرمها من حاجه تانيه أو نحكم عليها بيومين شوربة كرنب وكده .. واللى تكسل على واجب الرياضه او تنساه تاخدلها من ام شوشو علقة تمارين حلوه .. يعنى تجيبلها فيديو مثلا وتقولها ده تعمليه مرتين او كده .. اللى تقصر فى الصلاه بقى او تنسى واجب ام انس تقولنا عليه تتعاقب مثلا بقراية جزء او عشر ركعات او صيام يوم او غيره .. المهم ان عقوباتنا احلى من اى عقوبات لانها دايما فى مصلحتنا ..بس ما تفتكروش ان هيبقى فيه رحمه .. أنا هنا مكان امن الدوله الله يرحمه .. وهفتن على اى واحده بتعك .. وهحط السيخ المحمى فى صرصور ودنكم لو ما رجعتوش زى ما كنتو (حد فاكر الفيلم ده والنبى يقولى اسمه علشان نفسى اتفرج عليه )
وطبعا اعترافك بغلطتك وكمان تنفيذك للحكم اللى عليكى (هههههه حلوه الاحكام دى) هيكون بينك وبين ربنا يعنى انتى وضميرك بقى ..
واخدالى بالك انتى من رابعا دى يا موحه هه؟

خامسا:



معلش يا بنات سامحونى مش هنقدر نكبر الجروب علشان نقدر كلنا نتابع بعض .. علشان كده الجروب هيكون 16 بنت بس .. هما اول جاديييييين يدخلو ويبعتو بياناتهم ... واللى مش هتقدر تلتزم وتدخل بشكل يومى ولو شويه صغيرين يبقى ما تسجلش يا بنات لو سمحتو .. وهيكون فيه تجديد لدم الجروب بشكل اسبوعى علشان اللى مش هيلتزمو او يسجلو ويمشو زى ما بيحصل دايما فى معظم الجروبات مش هنربط نفسنا بحد .. اللى عاوزنا وعايز مصلحته وعايز رشاقته وصحته وشكله الحلو وخفة حركته (وشوية اصحاب ثورجيه مش هيتعوضو وعلى ضمانتى).. و.. و... يلتــــــــــــــــــــــــزم .. وبس مش هقول اكتر من كده ..(هههههه بعد ما شبعت رغى كالعاده طبعا).
تنويه : الاولويه فى الجروب هتبقى لحبايبنا القدام .. معلش سامحونى بس الدم بيحن واحنا راضعين على بعض والدم عمره ما يبقى ميه والاقربون اولى بالمعروف وحسنه قليله تمنع بلاوى كتيره وكده هههههههههه.
تقسيم الجروبات والتوقيعات والتفاصيل الكامله هتتضاف اول بأول ان شاء الله بمجرد اكتمال العدد ..


.. ياللا يا نشيطات .. ياللا يا حلوات ... العدد محدود .. والوقت كمان محدود .. يا تلحق يا ماتلحقش .. قررررررررررررررب ..قرب ..قرب ..ألا أونه ..ألا دونه..ألا تريه هههههههههههه...(زى المزادات بتاعة افلام ابيض واسود دى فاكرينها) ..ياللا استعنا عالشقا بالله .. مين هيفتتح المزاد ....؟ اه صحيح .. ملحوظه اخيره بس مهمه جدا جدا .. أى واحده تفكر تعمل ثوره عليا و تقلبنى من الجروب هعرفها شغلها .. انا مش بن على ولا مبارك ولا حتى القذافى المجنون.. والجروب ده مش مصر ولا تونس ولا ليبيا .. ومن النهارده مافيش حكومه .. أنـــا الحـــكومه ... نياهاهاها نياهاهاها ...